මෙය ෆිල්ම් පෙයාර් සම්මාන දිනූ, එමෙන්ම ඉන්දියානු සිනමාව තුළ බිහි වූ සුවිශේෂ සිනමා නිර්මාණයකි. හින්දි සිනමාවේ ජනප්‍රියතම චිත්‍රපට වර්ග කිරීම් අතර ඉහළ ස්ථානයක් ලබා සිටින, වෛද්‍යවරයෙක් සහ දුප්පත් තරුණියක් අතර ඇතිවන ආදර සම්බන්ධතාවයක් ගැන කියවෙන සංවේදී කතා පුවතක් රැගත් හින්දි චිත්‍රපටයකි. මෙයට සිංහල උපසිරසි ලබාදෙනමෙන් මාගේ හිතවතුන් කීපදෙනෙක් ද ඉල්ලා සිටියා. මෙතෙක් බිහි වූ හින්දි සිනමාව තුළ මා පෞද්ගලිකව ඉතාමත්ම ප්‍රිය කරන චිත්‍රපටයක්. එම නිසා ඉතාමත් ආශාවෙන් උපසිරසි කළේ. ඉතාමත් මියුරු ගීත සහ කූතුහලය පිරි කතාවක් රැගත් මෙම ලස්සන හින්දි චිත්‍රපටය ද, ඔබ ඉතා කැමැත්තෙන් නරඹනු ඇතයි මා සිතන්නෙමි. මෙය ද ශ්‍රී ලංකාවේ ඉතාමත් ජනප්‍රිය වූ චිත්‍රපටයකි. එමෙන්ම මෙහි ඇතුළත් හින්දි ගීත දැනට ද ශ්‍රී ලංකාවේ ඉතා ජනප්‍රියව පවතී.
මෙහි ප්‍රධාන චරිත වන්නේ ඩොක්ට වර්මා, කරුණා සහ කුසුම් ය. දෙමවුපියන් අහිමි “කරුණා” නම් තරුණියට රෝහලක රැකියාවක් ලැබේ. එහි සේවය කරන ඉතා කාරුණික වෛද්‍යවරයෙක්වන “වර්මා” සමඟ සහායිකාව ලෙස සේවය කිරීමට කරුණාට අවස්ථාව සැලසේ. එහි දී දෙදෙනා ආදරයෙන් බැඳේ.
ඩොක්ට වර්මාගේ පියා නොමැති නිසා ඔහුගේ අධ්‍යාපනයට උදවුකර ඇත්තේ තම මවගේ සොහොයුරාය. එනිසා යෝජනාවක් මත, මවගේ අධික බලකිරීම නිසා මාමාගේ දියණිය වූ “කුසුම්” සමඟ විවාහවීමට ඔහුට සිදුවේ. සංකර ගති පැවතුම් ඇති ඇය කෙරෙහි ප්‍රියතාවයක් නොමැති ඩොක්ට වර්මා අධික කලකිරීම මත විවාහ දිවිය ගෙනයයි. ආලයෙන් පරාජිත වූ කරුණා වෙනත් රෝහලකට මාරුවීමක් ලබාගනී. ඩොක්ට වර්මාගේ විවාහ දිවිය සාර්ථකවේ ද? කරුණාගේ අනාගත ඉරණම කෙසේ විසඳේ ද? එය නරඹලාම දැනගන්නට ඔයාලාට සුහදව ආරාධනා කරන්නෙමි!
මා විසින් මීට පෙර සිංහල උපසිරසි යෙදූ “බයිස්කෝප් වෙබ් අඩවිය” තුළ ඇති “දෝස්ති“, “ආයි මිලන් කී බේලා“, ඇන් ඊවිනින් ඉන් පැරිස්“, බූට් පොලිෂ්“, “සංගම්“, “සාති“, “මෙරා නාම් ජෝකර්“, “අනාරි“, “දේව්දාස්“, “ආහ්” යන පැරණි හින්දි චිත්‍රපට දහය සිංහල උපසිරසි සහිතව ඩී.වී.ඩී. අලෙවි සැල්වල ප්‍රදර්ශනය කර තිබෙනු දැකීමෙන් මා හට අපමණ සතුටක් දැනේ. එක්තරා යුගයක අතිශය ජනප්‍රිය වූ මෙම චිත්‍රපට පසුගිය කාලයේ ඇහැට දකින්නටවත් නොතිබුණි. ජනප්‍රිය පැරණි හින්දි සිනමා චිත්‍රපට ගොනුව හැකි තරමින් රට පුරා සිංහල උපසිරසි සහිතව ව්‍යාප්ත කිරීම මාගේ උපරිම උත්සාහයයි. එමෙන්ම යු ටියුබ් එකේ ඇති 657 mb ප්‍රමාණයක් සහිත, ධාවන කාලය පැය 2 යි, විනාඩි 23යි, තත්පර 33 ක කාලයක් සහිත වීඩියෝවක් මෙම උපසිරසිය සඳහා ගැළපෙන බව සලකන්න.
මෙය මාගේ “බයිස්කෝප් වෙබ් අඩවිය” හරහා දෙනු ලබන දහතුන්වන සිංහල උප සිරසිකරණයයි. මේ චිත්‍රපටය පිළිබඳව ද ඔයාලාගේ අදහස් දක්වන්න. ස්තූතියි!
Due to copyright issues, we do not provide any torrent link.
26 downloads
