හින්දු භක්තිකයන්ට අනුව අයෝධ්‍යාහි බබ්රි මස්ජිද් මුස්ලිම් පල්ලිය, මූඝල් අධිරාජ්‍යය යුගයේ ඉදිකෙරෙන්නේ රාම දෙවිඳුන් උපන් ස්ථානයේ පිහිටි රාම දෙවොල ගලවා ඉවත් කිරීමෙනි. ඉතිහාසගත කාලයක පටන් මේ සම්බන්ධයෙන් හින්දුන් තුළ පැවති විරෝධතා අවසන් වන්නේ 1992 දෙසැම්බර් මස 06 වන දින විසි පන් දහසක හින්දු සේනාවක් විසින් බබ්රි මස්ජිද් මුස්ලිම් පල්ලිය ගඩොලින් ගඩොල ගලවා ඉවත් කරනු ලැබීමෙනි. ඉන්දියාව පුරා හින්දු මුස්ලිම් කෝලාහල පැන නැගීමට මෙම සිදුවීම හේතු සාධක වූ අතර දෙපාර්ශ්වයේම සාමාන්‍ය ජනතාව නමසියයකට අධික පිරිසක් මේ නිසා මරණයට පත් විය. කෝළාහලයේ බලපෑමට හසුවන මුස්ලිම් පවුලක කතාන්දරයක් 2000 වර්ෂයේ තිරගත වන ෆිසා නම් හින්දි චිත්‍රපටයට පසුබිම් වේ.
1992 මුස්ලිම් – හින්දු කෝලාහලය අතරතුර අතුරුදහන් වී මුස්ලිම් අන්තවාදි කල්ලියකට සම්බන්ධ වන තම බාල සොහොයුරා, අමාන් (රිතික් රෝෂන්) සොයා යන ෆිසා (කරිස්මා කපූර්) නම් වැඩිමහල් සොහොයුරිය ඔහු නැවත තම නිවසට කැඳවාගෙන ඒමට සමත් වන්නී ය. තම පවුල වෙත එළඹුණු දුර්භාග්‍යය එතැනින් අවසන් වනු ඇතැයි ඇයගේත් ඇගේ වැන්දඹු මවගේත් අපේක්ෂාව වුවද කෝලාහල කාලයේ තමන් විසින් සිදු කරන්නට යෙදුණු යම් යම් ක්‍රියාවන්ගේ අඳුරු සෙවනැලි තව දුරටත් තමන් හඹා එන බව අමාන් වටහා ගනී.
කරිෂ්මා කපූර්ගේ අති විශිෂ්ට රංගනය මේ චිත්‍රපටයේ සාර්ථකත්වයට බෙහෙවින් ඉවහල් වී ඇත. එසේම ජයා භාදූරී, රිතික් රෝෂන් ආදි අනෙකුත් නළු නිලියන්ගේද රඟපෑම් විශිෂ්ටය. 2001 වර්ෂයේ ෆිල්ම්ෆෙයාර් සිනමා සම්මාන උලෙළේ හොඳම නිළිය සහ හොඳම සහය නිළිය වෙත පිරිනැමෙන සම්මාන ද්විත්වය මෙන්ම අයිෆා සම්මාන උලෙළේ හොඳම නිළිය සහ හොඳම සහය නිළිය වෙත පිරිනැමෙන සම්මාන ද්විත්වයද දිනාගැනීමට පිළිවෙලින් කරිෂ්මා කපූර් සහ ජයා භාදුරි සමත් වන්නේ මේ චිත්‍රපටයේ රඟපෑම් වෙනුවෙනි. එසේම ෆිල්ම්ෆෙයා සම්මාන උලෙළේ සම්මාන අටක් සඳහා ෆිසා චිත්‍රපටය නිර්දේශ වී ඇත.
මගේ පළමු උපසිරැසිය වශයෙන් ෆිසා චිත්‍රපටයේ උපසිරැසි මෙසේ ඔබ වෙත ඉදිරිපත් කෙරෙන අතර එයට අවස්ථාව සලසා දුන් බයිස්කෝප් සිංහලෙන් වෙබ් අඩවියට මගේ ස්තූතිය පිරිනමමි. ඉදිරියේදි තවත් උපසිරැසි සමග ඔබ හමුවීමට අපේක්ෂා කරමින් සමුගනිමි.
” Due to copyright issues, we do not provide any torrent links. “
47 downloads
