ජීවිතය කියන්නේ සල්ලි විතරක්ම නෙවෙයි. ජීවත් වෙන හැම කෙනෙකුටම ආදරය සෙනෙහස රැකවරණය කියන දේ අත්‍යාවශ්‍යයි. එය තවත් කෙනෙකු හරහා ලැබිය යුතු දෙයක්. එය ලැබුන්නැත්තම්, අපි ජීවත් වෙන ජීවිතයත් නිෂ්ඵල දෙයක් වෙනවා
ඉතින් යාළුවනේ පොරොන්දු වුණ පරිදිම මම ඇරගෙන ආවා තෝලා. වසරේ බිහිවුණ ලස්සනම සහ අර්ථාන්විත දමිළ සිනමා අතරින් එකක්. දමිළ සිනමාවේ ප්‍රබලයින් කිහිප දෙනෙකුගේ එකතුවක්. තමන්නා කාර්ති සහ නාගර්ජුනා වගේම ප්‍රකාශ් රාජ් සහ අනුෂ්කා. ඉතින් හොඳ නැතුව තියෙයිද !
සීනු කියන්නේ දුප්පත් තරුණයෙක්. කිසියම් වැරැද්දකට හිරේට ගිහින් ඉන්න සීනු ඉන් නිදහස් වෙලා සමාජයට එනවා. නමුත් කිසි කෙනෙක් ඔහුව පිළිගන්නේ නැහැ. ඔහුගේ අම්මා පවා ඔහුව ප්‍රතික්ෂේප කරනවා. වික්‍රම් ආදිත්‍යා. බිලියනපති ව්‍යාපාරිකයෙක්. නමුත් අත පය වලංගු නැහැ. ඒ නිසා තවත් කෙනෙකුගේ පිහිටෙන් තමයි ඔහු ජීවත් වෙන්නේ. හිරෙන් එළියට ඇවිත් ජීවත් වෙන්න රස්සාවක් හොයන අතරේ තමයි සීනුට වික්‍රම්ව මුණ ගැහෙන්නේ. සීනුගේ රස්සාව තමයි වික්‍රම්ව බලාගැනීම. සම්මුඛ පරීක්ෂණයට ආව සියයක් දෙනා අතරින් වික්‍රම්, සීනුව තම භාරකාරයා ලෙස තෝරගත්තා. එදා ඉඳන් සීනුගෙත් වික්‍රම්ගෙත් ජීවිත වෙනස් වෙන්න පටන් ගත්තා. ආහ් ! තමන්නා ගැන කියන්න අමතක වුණානේ. කමක් නෑ එයා කවුද කියලා ඔයාලම දැනගනීවි.
ආදරය..සෙනෙහස..මිනිසත්කම උතුරා යන කතාවක්. සාමාන්‍ය දමිළ චිත්‍රපටයක් බලලා ඉවර වෙද්දී අප හද තුළ උද්දීපනය වෙන්නේ වීරත්වය, කෝපය නැත්නම් ප්‍රචණ්ඩත්වය. දහ පහළොස් දෙනෙකුට එකවර ගහලා බිම හෙලද්දී අපිටත් ඒ හැඟීම් ආරෝපණය වෙනවා. පසුව මිනිසුන් ඒවා අනුකරණය කරනවා. නමුත් තෝලා බලලා ඉවරවෙද්දී අපේ සිත්වලින් මිනිසත්කම උතුරන්න පටන් ගන්නවා. ඒ නිසා මෙය හුදෙක් වාණිජමය චිත්‍රපටයක් පමණක්ම නොවෙයි..ඉන් ඔබ්බට ගිය දෙයක්.
අපේ රොයිලි අයියා උපසිරැසි ගෙනාව Intouchables ප්‍රංශ සිනමා සිත්තම ඔබ බලන්න ඇති. සම්මාන 32 කින් පිදුම් ලැබූ එම චිත්‍රපටයේ ඉන්දියානු පුනරාගමනය තමයි තෝලා. මෙහි ප්‍රධාන චරිත කිහිපයක් තිබෙනවා. විශිෂ්ටතම රංගනය නාගර්ජුනා සර්ගේ රංගනයයි. ඔහු නම් අති විශිෂ්ටයි. චිත්‍රපටයේ සාර්ථකත්වය ඔහු සතුයි. පසුව කාර්ති. ගිය වතාවේ කාර්තිව මම ඔයාලට ඇරන් ආවේ කොම්බන් හැටියට. නමුත් අද ඔහු සීනු ලෙස බොහොම හැඟීම්බර විශිෂ්ට රංගනයක් ඉදිරිපත් කරනවා. එතකොට තමන්නා. මීට පෙර මම තමන්නාගෙන් මේ වගේ රංගනයක් දැකලා නැහැ. ඇය බොහොම හොඳින් ඒ චරිතය නිරූපණය කරනවා. විශේෂයෙන්ම සඳහන් කළ යුතුයි මෙම චිත්‍රපටයේ සිනමාරූපණය ගැන. මෙහි එක්තරා දර්ශනයක් තියනවා පැරීසියේ වීදියක කාර් රේස් එකක් යනවා. ඒක නම් සුපිරියටම ඇරන් තියනවා. පොදුවේ වරදක් කියන්න නැහැ ටිකක් චිත්‍රපටය දිගයි එච්චරයි.
ඉතින් යාළුවනේ, මෙම චිත්‍රපටයේ හොඳ කොපියක් නිකුත් වෙලා තවම දින තුනක් නැහැ. හැකි ඉක්මණින් ඔයාලට උපසිරැසිය ඇරන් ආවා. මෙයට ඉංග්‍රිසි උපසිරැසි නොතිබුණ නිසා අසා ලිවීමක් තමයි කරන්න වුණේ. එහෙනම්, චිත්‍රපටය නරඹන්න, රසවිඳින්න කියලා ආරාධනා කරන ගමන්..ඔබ සැමට ජය ප්‍රාර්ථනා කරනවා. චිත්‍රපටය බලලා ඔයාලගේ අදහස අනිත් අයටත් බලන්න පහතින් කමෙන්ට් කරන්න අමතක කරන්න එපා !
820 downloads
