ජීවිතයත් මරණයත් අතර සටනකින් පස්සේ, යාන්තමින් ඇස් අරිනකොට, එකම එක රූපයක් පමණයි දැක්කේ… මං හිතුවෙම, දිව්‍ය විමානයෙන් මිහිපිට බට දිව්‍යාංගනාවක් කියලයි. පස්සේ තමයි දැනගත්තේ, මගේ ජීවිතය බේරපු දොස්තර නෝනා කියලා. දැකපු වෙලාවෙම මගේ හිත මොකක්දෝ වෙලා ගියා කියලා මට තේරුණා. ඔයාටත් එහෙම්මම වුණා කියලා මට විශ්වාසයි. මොකද, මං කාටවත් නොකියා ඉස්පිරිතාලෙන් පිටවෙලා ගියාම, මාව හොයාගෙන එන්න තරම් ඔයාගේ හිතේ මං ගැන සෙනෙහසක් තිබිලා තියෙනවා. මං ගැන සෙනෙහසක් ඒ ආදරණීය හදවතේ නොතිබුණා නම්, නොදන්නා මාව හොයාගෙන එන්න තරම් අපි අතරේ තිබුණ බැඳීම මොකක්ද? වෘත්තියෙන් මං ප්‍රහාරක ගුවන් යානා නියමුවෙක්. ඔයා, දොස්තර කෙනෙක්. මං සමහරක් මිනිස්සුන්ගේ ජීවිත අහිමි කරද්දී, ඔයා සමහරක් මිනිස්සුන්ගේ ජීවිත බේරාගත්තා. අපි දෙන්නට දෙන්නා නොගැලපෙනවා වගේ තමයි. හැබැයි, ගලපගන්න බැරි වෙන එකක් නැහැයි කියලා හිතුවා.
කොහොමින් කොහොමහරි, ඒ සංසාරගත බැඳීම ඇති වුණා. හරිම ආදරයෙන් තමයි අපි දෙන්නා ජීවත් වුණේ. රණ්ඩු සරුවල් නොවුණාම නෙමෙයි. ආදරය තියෙන්නෙ කොතනද, එතන රණ්ඩු සරුවල් තියෙනවා කියලා කතාවකුත් තියෙනවනෙ. හැබැයි, ඒ හැම දෙයක්ම තාවකාලිකයි. පුරුදු විදියටම, ආයෙත් අපි දෙන්නා ආදරයෙන් වෙලෙනවා. ආදරයෙන් තුරුල් වෙලා, නීල වර්ණ අහස කුස පුරාවට විදුළි වේගයෙන් පියාඹලා ගියපු අපි දෙන්නා දිහා, පක්ෂීන් පවා ඉරිසියාවෙන් නොබැලුවා නම් තමයි අරුමය… පොළවේ සිටින මිනිසුන් සෝ සුසුම් නොහෙලුවා නම් තමයි අරුමය… අවසානයේ, හැම දෙනාටම අස්වැසිල්ලක් ගෙන දෙමින්, ශාපය ඵල දුන්නා. අපේ කුරුළු කූඩුව සී සීකඩ බිඳී විසිරී ගියා…
ආදරණීය ලීලා! මගේ අතින් ඔයාට වැරදි සිදු නොවුණාම නෙමෙයි. ඒත්, ඒ හැම දෙයක්ම සිද්ධවුණේ, මගේ හිතේ ඔයා කෙරෙහි තියෙන සදාතනික ආදරය නිසාමයි. ඔයාව අවසාන වතාවට දැකලා අවුරුදු ගණනාවක් ගතවෙලා. එළඹෙන දවසක් දවසක් පුරාවට, එකම එක දෙයක් පිළිබඳවයි මගේ සිත මොර දෙන්නෙ. තව එකම එක වතාවක්, ඔයාගේ ඔය ලස්සන මූණ දැකගන්න මට අවස්තාවක් ලබාදෙන්න, දෙවියනේ! එනමුත්, සතුරු දේශයක, හුදෙකලා සිර කුටියක, තනිකම විසින් වෙලාගෙන සිටින්නාවූ මා දෙස, දෙවියන් වත් දෑස් විවර කර බැලීමට තරම් සානුකම්පිත වූයේ නැහැ. මාගේ ගැඹුරු වූ ආත්මයෙන්ම, සිතුවේ පැතුවේ එකම එක බලාපොරොත්තුවක් පිළිබඳවම පමණයි. මේ ආදරණීය හදවත සදහටම නතර වීමට පෙරාතුව, මේ ආදරණීය පුද්ගලයාගේ අවසාන හුස්ම බිඳත්, මේ වා තලයට මුසු වීමට පෙරාතුව, මා ආත්මයේ හිමිකාරියගේ ඒ ආදරණීය ඇස් දෙක, අවසාන වතාවට, එකම එක වතාවක්, යලි දැකගන්නට, මා හට වරම් ලැබේවිදෝ?
මතකද අපි ඉස්සර, හරිම ආසාවෙන් බලපු Roja (1992) චිත්‍රපටය? මතකද ඒ චිත්‍රපටයේ තිබුණු, ඒ හරි අපූරු සිංදුව… චීන්න චීන ආසෛ…! ඒ තරමටම හදවතට සමීප දෙයක්, කොහෙත්ම අමතක වෙන්න නම් බැහැ. මතකද, ඊට පස්සේ බලපු, Dil Se.. (1998) චිත්‍රපටය? හරි ලස්සන කතාවක්… ලස්සන සිංදු ටිකක්… මට නම් අද ඊයේ වගේම මතකයි. මේ චිත්‍රපටි දෙකේම සාර්ථකත්වය පිටුපස, එක්තරා අදෘෂ්‍යමාන හස්තයක් ක්‍රියාත්මක වුණා. මේ අදෘෂ්‍යමාන හස්තය විසින් අත ගහන ගහන හැම චිත්‍රපටයක්ම වගේ අතිශය සාර්ථක වෙන්න ගත්තා. ඇදහිය නොහැකි සාර්ථකත්වය සහ පවතින සාම්ප්‍රදායන් අතික්‍රමණය කරමින් බිහිකරන ලද නිර්මාණයන් නිසා සමහරු මේ පුද්ගලයාව මායාකාරයෙක් ලෙසත් හඳුන්වන්න ගත්තා. ඒ, වෙන කවුරුවත් නෙමෙයි… මනි රත්නම් මහත්මයා! වසර කීපයක නිහැඬියාවකින් පස්සේ, මෙන්න එතුමා නැවත වතාවක් කරලියට ප්‍රවිෂ්ඨ වෙලා තියෙනවා. හැබැයි, හිස් අතින් නම් නෙමෙයි. ඔස්කාර් සම්මාන ලාභී, A. R. රහමන් මහත්මයාගේ අතිශය සුමියුරු සංගීතයෙන් රස ගැන්වී, දකුණු ඉන්දීය තාරකාව, Karthi ගේ විශිෂ්ට රංගන ප්‍රතිභාවෙන් සහ, Aditi Rao Hydari ගේ හද මන්මත් කරවන සුළු, අයස්කාන්ත රංගයෙන් වර්ණවත්වූ, විශිෂ්ඨ සිනමා කෘතියක් සමගින් තමයි, මනි රත්නම් මහත්මයා මේ වතාවේ කරළියට ප්‍රවිෂ්ට වෙන්නෙ. 2017 වර්ෂයේ අප්‍රේල් මස 7 වෙනි දින, Romance කාණ්ඩය යටතේ තිරගතවීම ආරම්භ කරන ලද මෙම සිත්තම, මේ සටහන ලියවෙන මොහොත වන විට, Imdb දර්ශකයේ 6.2 ක අගයක් තමන් සන්තක කර ගැනීමට සමත් වී තියෙනවා.
ඇත්තටම, මේ චිත්‍රපටය ගැන ගොඩක් ආසාවෙන් හිටියත්, උපසිරැසි ගන්වන්න නම් බලාපොරොත්තුවක් තිබුණේ නැහැ. මොකද මේ චිත්‍රපටයට HC Sub එකක් තමයි නිකුත් වුණේ. ඒ කියන්නෙ, මුල ඉඳලම ලයින් හදාගෙන තමයි කරන්න වෙන්නේ. ඒ කියන්නෙ, සාමාන්‍ය චිත්‍රපටයක් වගේ දෙගුණයක් මහන්සි වෙන්න ඕනේ. නමුත්, මොනවා බලාගෙනද? පුරුදු විදියටම මේකටත් උපරිම කමෙන්ට් 20-25ක් වැටේවි. ඔය කමෙන්ට් 25 ගන්න, ඔය තරම් මැරෙන්න ඕනෙද…? එහෙම තමයි මට හිතුණේ. ඇත්තම කියනවා නම්, දැන් මේ උපසිරැසි කරන්නෙ පුරුද්දට වගේ මිසක්, කිසිම කමෙන්ට් එකක් බලාපොරොත්තුවෙන් නම් නෙමෙයි. දැන් වැටෙන කමෙන්ට් සංඛ්‍යාවත් එකක්, ඒ ගැන තිබිච්ච ආසාව මැරිලා ගිහිල්ලා දැන් සෑහෙන කාලයක් වෙනවා. මං දැක්කා සමහරු අහලා තියෙනවා, ලයික් බොත්තමක් ඔබනවා වගේ ලේසියට, කමෙන්ට් එකක් දාන්න විදියක් තිබුනා නම්, ගොඩක් දෙනෙක් කමෙන්ට් දාවි කියලා. ඒ ගැන කියනවා නම් මට හිතුන දෙයක් තමයි, ලයික් බොත්තමක් ඔබනවා වගේ ලේසියට උපසිරසියක් කරන්න පුළුවන් වුණා නම්, මීට වඩා ගොඩක් දෙනෙක් උපසිරැසි කරාවි නේද කියලා… හැමදෙයක්ම අන්තිමේ, කළකිරීමක් විතරයි ඉතුරු වෙලා තියෙන්නෙ. ඒ කතා වලින් වැඩක් නැහැ. චිත්‍රපටය නොකරන්න හිතාගෙන හිටියත්, මොන හේතුවක් නිසාද මන්දා, කොහොමින් කොහොමහරි චිත්‍රපටය කරන්න බාරගත්තා. මේ වෙලාවේදී විශේෂයෙන්ම මතක් කරන්න ඕනේ සඳුන් ධනුෂ්ක සොයුරාව. කාල රාමු නිර්මාණය කිරීම වෙනුවෙන් ඔහුත් උපකාර කළා. ඒ වෙනුවෙන් සඳුන් සොයුරාට විශේෂ ස්තුතියක් පුදකර සිටිනවා. ඒ වගේම කියන්න ඕනේ, චිත්‍රපටය පුරාවටම, A.R. රහමන් මහත්මයාගේ අතිශය මියුරු සංගීතයෙන් වර්ණවත්වූ සුමියුරු ගීත කීපයක්ම අන්තර්ගත වෙනවා. මගේ මතය අනුව නම්, සෑහෙන කාලයකට පස්සේ තමයි දමිළ චිත්‍රපටයක් තුලින් මේ වගේ අතිශය මිහිරි ගීත සමුහයක් අහන්න ලැබුණේ. මේ ගීත සියල්ල සඳහා උපරිමයෙන්ම උපසිරැසි ගන්වලා ඇති.
එහෙනම් ගිහිල්ලා එන්නම්. යන්න කලින් තව එක දෙයක් කියන්න තියෙනවා. අධ්‍යාපන කටයුතු සහ අනෙකුත් වැඩ රාජකාරි නිසා, ඉස්සර වගේ උපසිරැසි වෙනුවෙන් කාලය වැයකරන්න අදහසක් නැහැ. කලින් නම් මාසෙකට අඩුම වශයෙන් චිත්‍රපට 4ක් හෝ 5ක් අනිවාර්‍යයෙන්ම දුන්නා. ඒත්, අපේ වටිනා කියන කාලය නාස්ති කරගෙන, තමන්ගේ වැඩ පාඩු කරගෙන, සමහර වෙලාවට නිදිමරාගෙන කරන මේ වැඩෙන් අපිට ආත්ම තෘප්තියක් වත් ලැබෙන්නෙ නැත්නම්, ඒ කරන වැඩේ කිසිම ප්‍රයෝජනයක් තියෙනවද? මේ චිත්‍රපටය පවා මේ උපසිරැසි ගන්වන්නේ, විභාගයක් ඔන්න මෙන්න තියාගෙන. හොඳ දෙයක් දැක්කාම හොඳයි කියලා කියන්න මැලි වෙන මිනිස්සුම තමයි, පුංචි හරි අඩුපාඩුවක් දැක්කම, රෙදි උස්සගෙන, දෙමව්පියන්ගේ පවා ගුණ වයමින්, තමන්ගේ දුර්ජන ගතිය පෙන්වන්නෙ. මේ සඳහා උදාහරණ පහුගිය ටිකේ ඕනෙතරම් බලාගන්න තිබුණා. කොහොමත් ලංකාවේ මිනිස්සුන්ට ඕනෙම දෙයක්, ඕනෙවට වඩා ලැබෙනකොට, ඒකෙ කිසිම අගයක් නැතිවෙලා යනවනෙ. අනික, කිසිම මුදලක් අයකර නොගෙන, නොමිලේම කරන සේවයක්නේ. ඒ නිසා කිසිම අගයක් නැතුව ඇති. මේ කතාව කිව්වේ හැමෝටම නෙමෙයි. වදින කෙනාට වැදේවි. තමන්ගේ හදවතට තට්ටුවක් දාලා අහලා බලන්න, තමන් අයිති මොන කාණ්ඩයටද කියලා. මේ හේතු නිසා, මීට පස්සේ තෝරාගත්ත සීමිත චිත්‍රපට සංඛාවක් සඳහා පමණක් උපසිරැසි කරන්න තමයි හිතාගෙන ඉන්නෙ. බලමු, ඉස්සරහට මොකක් වේවිද කියලා. මේ තීරණය වෙනස් වෙන්නත් පුළුවන්, නොවෙන්නත් පුළුවන්. යන්න කලින් තව එකම එක දෙයක් කියන්නම්. මේ තත්වය දිගටම තිබුණොත්, පළපුරුදු උපසිරැසිකරුවන්ගේ කළකිරීමත් සමගින් ඔවුන් උපසිරැසිකරණයෙන් ඈත් වුවහොත්, මේ ක්ෂේත්‍රයේ කඩා වැටීම වැඩි ඈතක නම් නොවේවි. බයිස්කෝප් අඩවියට නිතර යන එන අයෙක් නම් හොඳටම දන්නවා ඇති, දවසකට මේ අඩවියෙන් චිත්‍රපටම විතරක් කීයක උපසිරැසි නිකුත් කරනවද කියලා. ඒ දවස් වල උපසිරසියක් වෙබ් අඩවියේ පළකරගන්න නම්, දවස් ගාණක් බලාගෙන ඉන්න වුණා. ඒ තරමට උපසිරැසි තිබුණා. නමුත් දැන්, සමහර දවස් වලට එක චිත්‍රපට උපසිරසියක් වත් පළවෙන්නේ නැති දවස් ඕනේ තරම් තියෙනවා. නිවී හැනහිල්ලේ කල්පනා කරලා බලන්න හේතුව මොකක්ද කියලා. තේරේවි… හැබැයි ටිකක් කල් යාවි. එතකොට පරක්කු වැඩි වේවි. ඒ අනිසි ඵලවිපාක ලැබෙන්නෙ අපිට නෙමෙයි… ප්‍රේක්ෂක ඔබටම තමයි.
එහෙනම්, හැමෝටම ජයවේවා!!!
Due to copyright issues, we do not provide any torrent links.
www.TamilRockers.lv – Kaatru Veliyidai (2017) Tamil HDRip x264 700MB ESubs
ලබා දී ඇති උපසිරසි සියලුම HDRip පිටපත් සඳහා අදාළ වේ.
202 downloads
